MP3 jaitsi (20 Mo)

Pilotan, esku huska, buruz burukako txapelketa bidegurutze batean sartuko da asteburu honetan. Maila desberdineko pilotariek goiti eta beheiti joateko kanporaketak jokatuko dituzte. Bigarren mailako hoberenek adibidez, asteburu honetan irabaziz geroz, igaiteko aukera izanen dute.

Estebe Paraxu itsasuarraen kasua da eta Olatz Idoaterekin hitz egin du.

Ostiral honetan jokatuko dira lehen kanporaketak, otsailaren 14an, Arrangoitzen 19.00tan:

• Nicolas dufau / Frantxoa Lafitte
• Aritz Lekuona / Xalbat Duhalde

Larunbatean, otsailaren 15ean, Larresoron 18:30tan:

• Asier Aspuru / Benjamin Gachen
• Iban Jauregiberri / Panpi Idiart

Larunbatean, otsailaren 15ean, Ezpeletan 18.00tan:

• Bittor Tikoipe / Estebe Paraxu
• Bixente Elgart / Abenttin Duhalde

Igandean, otsailaren 16an Ezpeletan 16.00tan:

• Florient Mendiburu / Améée Lafitte
• Beñat Maitia / Andoni Larre

Igandean, otsailaren 16an Donibane garazi 16.00tan:

• Iñigo Etxamendi / Ruben Santamaria
• Iban Antxordoki / Mattin Etxeberri

MP3 jaitsi (39 Mo)

Ziburun bi egunez herritar batzuekin solasean aritu ondotik, bertan bildu soinuak, eta argazkiak, Züek Heben emanaldian aurkeztu dituzte hirugarren egunean, Baltsan elkartean.

Mixel Etxekopar eta Jean Christian Galtxetaburu musikari, Pierre Vissler soinu hartzaile eta Inge Arin argazkilari lanetan aritu dira. Arrantzale, ostalari, kultura eragile edo ikastolaren inguruko gertakariak, poesiaz musikatu dituzte. Aldi bakar batez aurkeztu dute beren egonaldia Baltsanen, otsailaren 8an.

Itsasbazterreko zazpi herritan ibiliko dira "Atlas geopoetiko" soinu-liburua sortzeko helburuarekin. Jada beste bi ale badituzte argitaraturik.

MP3 jaitsi (20 Mo)

Biarnoko makroproiektu bat aipatzeko, bilkura publikoa antolatzen dute Azkainen ostiral honetan 18:00etan Bilgune gelan.

E-CHO izenarekin, ekologikoa den proiektu baten kolore "berdea" du. Itxura hala du, Zuberoatik hurbil, Biarnoko Lacq herrian egitekoa den egitasmoak hiru gune industrial lituzke: hidrogenoa ekoizteko lantegi erraldoi bat, eta hegazkin ta itsasontzientzako erregai "berdeak" ekoizteko bi lantegi.

Arantxa Idieder mintzatu da bilkura antolatzaile den Michelle Gracy-rekin.

MP3 jaitsi (21 Mo)

Basusarri-Arrangoitzeko Biez Bat ikastolak 10 urte betetzen ditu 2025 urtean. Kontzertu batekin hasiko dute ospakizuna, otsailaren 8an larunbatean. PiLT aspaldiko taldea etorrarazten dute, 90. hamarkadako talde famatua, etenaldi luze baten ondotik berriz oholtzara itzuli baitira bizkaitarrak, disko berriaren aurkezteko.

Bad Sound, Punttu Kakotx eta Dj Bull taldeak ere ariko dira, Arrangoitzeko gelan. Aitzin salmentak, otsailaren 6an 22:00etan bukatzen dira.

MP3 jaitsi (9 Mo)

Kanbon Marieniako lurretan, Bouygues-k bidean duen proiektuaren kontra mobilizatzeagatik, otsailaren 11n auzitan pasako diren hiru akusatuen aldeko gaualdia antolatu dute Itsasuko Goxokin.

Otsailaren 8an, arratseko 7etan izanen da kantu, jateko eta edateko eta Ixtaklok, Spartak Dementziala, Ez Dok Bape, eta Both taldeek joko dute. Panpi Mercapidek xehetasunak bildu ditu auzipetua den Marienia ez Hunki kolektiboko Filipe Laskaraiekin.

MP3 jaitsi (19 Mo)

Urte zibila hastearekin batera, hezkuntza sistema ondoko sartzeari begira jartzen da usu.

Ikasleek, jada gogoetatu behar dute zer egin nahi duten heldu den sasoian, ondorioz eskola eta ikastolek beren proposamenak azaltzeko ate irekiak antolatu ohi dituzte.

Olatz Idoate Baionako Bernat Etxepare lizeoan nola antolatu diren ikustera joan da, otsailaren 1ean goizeko 9ak eta 12ak artean ate irekiak proposatzen baitituzte. Iker Edme eta Nagore Jimenez irakasleekin xehetasunak.

MP3 jaitsi (24 Mo)

Ihaute sasoian sartzen garelarik, prestaketa lanak ere abiatuak dira leku anitzetan. Uztaritzen adibidez, martxoaren 4ko astearte gizen-ean parte hartzeko, zirtzilak antolatzen hasiak dira. Urtero bezala, bilkura publiko bat proposatzen dute, pintxo eta edarien inguruan, zirtzilen taldean sartzeko goga duten guziei irekia.

Zirtzilen aurkezpen bilkura urtarrilaren 31n eginen dute Uztaritzeko Batzokian, arratseko 19.00tan. Olatz Idoatek hitz egin du, Maritxu Goihenetxe eta Xabi Etxegarairekin.

MP3 jaitsi (26 Mo)

2023 erditsuan errezibitu genituen irratian, Amandine Cazaux eta Lisa Garra, haien xedea aipatzeko. Haurtzain-etxe euskaldun bat sortu nahi zuten eta egoitza bila ziren.

Aiherran, Itxaro Elosegi Martinon haurtzain-etxe proiektu bat muntatzen ari zen, herriko etxea berritzen ari den Beltzagitea etxean. Elkartu eta, hiruek elkarrekin, Eguzkilore elkartea muntatu dute, obretan den haurtzain-etxea berria apirilean irekitzeko asmoarekin, eta diru-biltze kanpaina bat ere abiatu dute.

Hiru ardatz nagusitan oinarritzen da proiektua, euskara, natura eta motrizitate librea. 12 haur hartzen ahalko dituzte Aiherrako Eguzkiloren, eta sare sozialen bitartez jartzen ahal zirezte harremanetan elkartearekin, edo emailez mam.eguzkilore@gmail.com helbidera idatziz.