Egoera larria da Ipar Euskal Herriko irratientzat. Frantziako gobernu berriak, diru murrizketak egingo dituela adierazi duelarik, SNRL Frantziako irrati libreen sindikatuak deskubritu du irratiei ematen dizkion laguntzak %35 apaldu nahi zituela.
Proposamena bozkatua baldin bada irratiek, diru iturri nagusi bat galduko lukete. Horrekin batera, irrati elkarte zonbaitzuren desagertzea, eta langilego parte baten kanporatzea dator, baita gure estrukturentzat ere.
Frantziako kultura ministeritzak proposatzen duen murrizketa bakarra da, eta irratiaren sektorea osotasunean hunkitzen du.
Elkarte irratiek ukaiten dugun FSER (Fond de Soutien des Radios Libres) deitu diru funtsa murrizteko xedea du 2025 urteko aitzinkontuan, 10 milioi euroko apaltzea.
Gaur egun 700 elkarte irrati badira Frantzian, sos apaltze honekin, 200 inguru desagertuko dira SNRL irrati libreen sindikatuaren arabera. Ttitto Betbeder, SNRL sindikatuko idazkari nagusia eta Euskal irratien administrariarekin hitz egin du Jose Luis Aizpuruk.
2024ko Urriaren 16a
Errugbian, igandean urriaren 6an hasi dute denboraldi berria AS Baiona taldeko neskek. Elite 2 mailara igo berri dira. Eta lehen eguna kari, Pariseko Stade Français errezebitu dute Baionako Cacareigt zelaian. 12 eta 31 galdu dute baionarrek, lehen mailatik jautsi berri diren paristarren aurka.
Partida baino zonbait lehenago Maika Duhalt jokolariarekin hitz egin du Kriztof Arotzarenak.
2024ko Urriaren 07a
Kilika Gaztetxeak Azkainen larunbatean ospatuko ditu bere 17 urteak.
Bertso poteoa, bazkaria eta kontzertuak izanen dira Azkaingo plazan, Xurion eta Gaztetxean. Mugan, Txopet, Nikotina eta Maskak taldeak ariko dira plazan, eta gaualdiak segituko du gaztetxean, DJ Jow, Los Angelesetik espresuki etortzen dena Kilika gaztetxearentzat...
Bazkarirako izenak emateko deitu 07 64 73 23 37.
Panpi Mercapide mintzatu da gaztetxeko hiru kiderekin, Xabi, Xan eta Joannisekin.
2024ko Urriaren 03a
"Jeiki Lapurtarrak" lema argi dute, Lapurtarren Biltzarrak nahi du segitu lapurtarren iratzartzen. Igandean, urriaren 6an iraganen da besta egun osoan Uztaritzen.
Gora beherak ukan ditu bestak, bainan antolatzaileak motibatuak dira egunaldi goxo bat prestatzeko. Aldaketen artean goizeko desfilerako, ez dutela karro desfilerako deialdirik egin aurten bainan dantzari eta musikariekin, eta eguerdiko bazkaria nahieran izango da, ez da tarte behartu batean izango. Gaitamik, Uztaritzeko txaranga, Foisis eta Frikun taldeak ariko dira.
Panpi Mercapide mintzatu da Xabi Etxegarai, Eva Eiherabide eta Tomas Brillaxis antolatzaileekin.
2024ko Urriaren 02a
Filo Txokoren bigarren hitzordua proposatzen du Maiatz argitaletxeak astearte honetan. Bil Txokon (Augustinoen karrikan) 18:30tan biltzea proposatzen dute, hitz egiteko, trukatzeko, filosofiatzeko Jean Etxepareren testu batetik abiatuz.
Buruxkak, 1910ean atera zuen testu bildumatik "Egiaren hiru itxurak" artikulutik abiatzea proposatzen dute. Laborariak eta proletalgoaz baita egiaz ere hitz egiteko parada. Arantxa Idieder mintzatu da Beñat Castorene antolatzailearekin.
2024ko Urriaren 01a
Glisseguna igandean irailaren 29an izango da usaian bezala, Angeluko La Barre hondartza bazterrean. Skate, surf, hip hop dantza edota yoga bezalako aktibitateak entseatzeko eguna proposatzen du azken 21 urteetan.
Jakin surf lehiaketa aldiz larunbatean izan ordez, igandez izango dela aroagatik eta azpimarratzeko hitzorduetan helduentzat, Euskara iniziazioa Plazara-rekin.
Ramuntxo Etxeberri antolatzailearekin mintzatu da Arantxa Idieder.
2024ko Irailaren 27a
1981 2025
Gure Irratia 1981ean sortu zen Milafrankako etxe batean. Ondotik, Baionako Passemillon karrikarat eraman zituen estudioak eta hortik Poissonerie karrikarat. 2006ko apirilean Gure Irratia Uztaritzera jin zen Landagoien gunera, baina 2006ko abenduan izan sute batek, egoitza guzia suntsitu zuen. Berriz ere obrak egin artean, Gure Irratia, Uztaritzeko herriko etxeak prestatu egoitza batean egon zen eta 2009ko azaro ondarreko gure lehengo egoitzarat itzuli zen. (Ikusi Kanaldudek zabaldu zuen erreportaia: SALTOK: Gure Irratia... azkenean etxean!)
Gure Irratiak 8 langile ditu denbora osoz urte osoan eta laguntzaile sare zabala du.
Gaur egun 30.000 entzule ditu Gure Irratiak eta 106.6 eta 90.5 frekuentzietan entzun daiteke.
1999an, Euskal Irratiak-en federazioa sortu zen. Hor biltzen dira, Baxe Nafarroako Irulegiko Irratia, Xiberoako Xiberoko Botza, berantago sortu zen Hendaia eskualdeko Antxeta Irratia, eta Gure Irratia ere. Programazioaren parte haundiena 4 irratien artean kudeatzen dugu, eta oren batzuk ditugu irrati bakoitza bere aldetik aritzeko.
2009 | Egoitza berritura itzultzen
Gure Irratiaren egoitza osoki suntsitu zuen sute batek, 2006ko abenduan, Uztaritzeko Landagoien auzoan. 3 urte luzeen ondotik, azkenean, egoitza berri berrian sartu dira langileak. Gomita: Ihintza Arrieta kazetaria. Aipaldia: Ttur Ttur Tur encierro ttiki. LasterK: Lehen partean, Maialen Berterretxek Patxi Sallaberry Baztandarrak mendizale elkarteko kidea errezibitzen du. Erreportaia: Donibane Garaziko Garatenea trinketa pilotazalez betetzen da astelehen guziz. Partida denboran, jarlekuetako giroa jasta ezazu.
(Milesker Kanaldude-ri egindako bideoagatik)
Gure Irratiak 40 urte!
Diru bilketa kanpaina baten bidez, urtarrilaren 31ra arte – Gure Irratiak euskararen presentzia bermatzen du Lapurdin.
Gure Irratiak rol soziala badu, Euskal Irratiak sareko irrati guziek bezala.
Zuen beharra badugu, beti, kalitateko irrati bat eskaintzen segitzeko, materiala berritzeko eta laster etorriko den DAB+ irrati numerikoari doakion materialaren erosteko.
Gure Irratia - Landagoien - 64480 UZTARITZE | tel: 05 59 59 30 01
Legezko oharrak | Diseinua eta programazioa iF Diseinuak - 2016
