MP3 jaitsi (27 Mo)

Otxanda Larzabal-Idiartek film bat eta zinema festibal bat aipatu dizkigu aldi honetan.

• Resilient Man dokumentala, dantzari baten segipena zauria bizitzeko eta gainditzeko bide hortan
• Docketan Topa Baionako Atalante zinema festibalean ikusgai izango diren film batzu aipatu dizkigu, Iraniarrak eta bereziki euskaldunak.

MP3 jaitsi (47 Mo)

Gipuzkoako Alegia herrikoa zen Anjela Kerexeta Aizpuru, gazte-gaztetik Tolosako ostatu batean zerbitzari ibili zena. Joxe Mari Iparragirre Balerdi aipatu tabernan ibili zen kantari eta bertsoz kortejatu zuen neska gaztea. Garai hartan Iparragirrek 36 urte zituen.

Argentinara joan ziren, eta Buenos Airesen ezkonduko ziren. 1858ko udan iritsi ziren Buenos Airesera, eta hango portuan euskaldun asko zeuden Joxe Mari Iparragirreren zain, ordurako bere kantua, “Gernikako Arbola” alegia, arras famatua eta zabaldua baitzen munduko euskaldun guztien artean.

Anjela Kerexetaren bizi istorioa kondatu digu Joseba Aurkenerenak.

MP3 jaitsi (34 Mo)

Joanes Garcia Basurkok, hilabete honetan ozeano batek separatzen dituen bi artista elkartzea proposatzen du musika kronikan:

Adrianne Lenker estatu batuarrak, Bright Future bosgarren diskoa ateratzen du. Big Thief taldearekin ezagutu genuen artistak, disko intimista atera du, "oreka lortu duen maisu lana".

Gorka Urbizu Euskal Herrian gehiago ezagutzen dugun musikariak, Berri Txarrak taldea bere ibilbidearen gibelean utzita, "estetika berezi bezain asumitua duen" Hasiera Bat diskoa aurkeztu digu Joanes Garcia Basurkok.

MP3 jaitsi (35 Mo)

2018an elkarrizketatu zuen Mixel Ducau Terexa Lekunberri antropologoak.

Eleketa proiektuarentzat, Anje Duhalde elkarrizketatu ondotik zonbait urtera, Baionako musikariarekin solastatu zen, usaian bezala bere haurtzarotik hasita gaurkora hitz egiteko.

Amaren zaletasuna kantuarentzat, Fauxtin Bentaberriren influentzia, intrumentuaren hautaketa, dantzaldi taldeak eta bistan dena Errobi eta testuinguru politikoa besteak beste aipagai gaurkoan Arantxa Idieder.

MP3 jaitsi (37 Mo)

Jon Miranderen Haur Besoetakoa aipatu digu hilabete honetan Nora Arbelbide kronikariak. Pedofilia, intzestoa edota suizidioa bezalako gaiak jorratzen dituen eleberria, Jon Miranderen bakarra izan zen.

1970an argitaratu zuen testua 10 urte lehenago idatzia zuen, bainan ez zuen nehork lehenago atera nahi izan.

Jon Mirande tabuz inguratua, nazia izan zelako, eta testu higuingarriak zituelako ere, Nora Arbelbidek Haur Besoetako euskal literaturaren klasiko bat dela aipatu dio Arantxa Idiederri. (Kasu Spoiler ttipi bat kronikan, liburua irakurri nahi duzuenentzat!)

Jon Miranderi buruzko Josu Martinezen filma ostegunean, apirilaren 11an aurkeztuko dute Baigorrin 20:30tan, eta ondotik solasean ariko dira Joseba Sarrionandia eta Nora Arbelbiderekin batera.

MP3 jaitsi (29 Mo)

Jatorriz serbiarra den Josef Nadj artista aipatzen digu hilabete honetan Arantxa Lannes kronikariak.

1957an sortu artista marrazkian hasi zen, eta Parisera joan zelarik bizitzera mimoa edota dantzan murgiltzen hasi zen. Josef Nadjek unibertso berezi bat sortzen du bere ikusgarrietan, absurdoa, poesiarekin eta iluntasunarekin ere.

Jestual biziki zorrotz eta zehatza duen dantzaria aipatzearekin batera, dantza garaikidearen gaian ere sartu dira Arantxa Idiederrekin. Aipatzen dituen hiru ikusgarriak: Paso Doble, Les Corbeaux eta Mnémosyne.

MP3 jaitsi (19 Mo)

Beltzane Obanos kronikariak, hilabetero bezala gure dirua kudeatzeko proposamenak egiten dizkigu.

Helburuak finkatu behar dira bainan horretarako amestu behar da, eta garai honetan ezin baldin bada amestu paso egitea proposatzen du Beltzanek. Bestenaz "argazki " bat hartzea proposatzen du, gure ondareaz adibidez (etxea, autoa eta beste).

MP3 jaitsi (27 Mo)

Bi liburu aurkeztu dizkio hilabete honetan Olatz Idoateri, IKAS pedagogia zentroko langilea den Elise Dilet-ek.

• Euskal herriko 40 emakume IRAKURKETA ERRAZA bildumako Cira Crespo eta Elena Ciordiarena. Irakurtzeko eta ulertzeko zailtasunak dituzten pertsonei zuzenduta da. Liburuetan hizkuntza erraza, zuzena eta egunerokoa erabiltzen da, hemen 40 emazte ezagutaraziz.
• Ezin ezetz Esan Mariasun Landaren liburua: "Herri txiki eta berezi honetan, inoiz ezagutu ez den fenomeno bat gertatu zen: EZ hitza erabat desagertu zen jendearen aho eta bihotzetatik... Ez zuten EZ bezalako hitzik ezagutzen, ezta horren beharrik sentitu ere."